SysAdmin Day 2025: İT icmasının görüşü

25 iyul tarixində “Mala Praha” restoranında Sistem Administratoru Gününə həsr olunmuş — SysAdmin Day 2025 çərçivəsində qapalı tədbir keçirildi. Axşam ölkənin müxtəlif şirkətlərindən sistem administratorları, İT mütəxəssisləri, DevSecOps mühəndisləri, İT direktorları və CISO-ların daxil olduğu SysAdmin AZ Channel icmasının üzvlərini bir araya gətirdi.

Tədbirin açılış nitqi ilə SmartIT şirkətinin satış direktoru Rinat Mustafayev çıxış etdi. O, tədbirin təşkilatçısı olan SmartIT şirkətini və sponsorları — Bakotech və Softprom şirkətlərini təqdim edərək, onların dəstəyinə və icmanın inkişafına verdikləri töhfəyə görə təşəkkürünü bildirdi.

Axşamın xüsusi hissəsi 2009-cu ildə yaradılmış SysAdmin AZ Channel icmasının tarixinə həsr olundu. Təşkilatçılar icmanın 10 nəfərdən 250 nəfərə qədər necə böyüdüyünü əks etdirən video təqdim etdilər. “İcmamızın yalnız aktivliyini qoruyub saxlamasından deyil, həm də ölkə üzrə getdikcə daha çox İT mütəxəssisini birləşdirərək böyüməsindən məmnunuq”, — deyə təşkilatçılar qeyd etdilər.

Tədbir zəngin proqramla müşayiət olundu: qonaqları tematik suallardan ibarət interaktiv Kahoot viktorinası gözləyirdi və qaliblər yadda qalan, dəyərli hədiyyələrlə mükafatlandırıldı. Axşama xüsusi ab-hava isə dəvət olunmuş DJ tərəfindən yaradıldı — o, bütün gecə ərzində musiqi ilə əhval-ruhiyyəni yüksəldərək tədbirin enerjisini canlı saxladı.

Bakıda SysAdmin Day artıq uzun illərdir ki, yerli İT icması üçün gözəl bir ənənəyə çevrilib. Bir çox iştirakçılar üçün bu, sadəcə peşə bayramı deyil, həm də canlı ünsiyyət, təcrübə mübadiləsi və peşəkar əlaqələrin möhkəmləndirilməsi üçün bir fürsətdir. 2025-ci il tədbiri bir daha göstərdi ki, bu cür ənənələr öz aktuallığını və əhəmiyyətini qoruyub saxlayır.

Tədbirdə iştirak edən hər kəsə iştirakına, enerjisinə və icmanın inkişafına verdiyi töhfəyə görə təşəkkür edirik.